Зменіцца метадалогія працы Сіноду Біскупаў

Дэталёвы аналіз праекта “Instrumentum Laboris” і прапаноў па зменах метадалогіі працы кастрычніцкай біскупскай асамблеі быў прадметам абмеркаванняў Рады Сакратарыяту Сінода Біскупаў 25 і 26 мая 2015 г. у Ватыкане. У спатканні прыняў удзел папа Францішак, чыя прысутнасць, як гаворыцца ў спецыяльным паведамленні Сакратарыяту, сведчыць аб вялікім значэнні, што надае Пантыфік працэсу падрыхтоўкі да Сінода. XIV Звычайная Генеральная Асамблея Сінода Біскупаў пройдзе 4-25 кастрычніка 2015 г., а яе тэмай будзе “Пакліканне і місія сям’і ў Касцёле і сучасным свеце”.

Як паведамляецца, праект “Instrumentum Laboris” быў падрыхтаваны на аснове справаздачы надзвычайнай сесіі Сінода, якая прайшла ў кастрычніку 2014 г. у Ватыкане, а таксама на падставе адказаў на пытанні, заключаныя ў падрыхтоўчым дакуменце (Lineamenta), якія прыйшлі ў Генеральны сакратарыят ад асобных біскупскіх канферэнцый, іншых касцёльных структур і асобных вернікаў. На гэтай аснове была распрацавана прапанова тэксту “Instrumentum Laboris”, які выйдзе ў рэдакцыі Генеральнага сакратарыяту і будзе перакладзены на некаторыя мовы. Яго публікацыя адбудзецца праз некалькі тыдняў.

Таксама падчас ватыканскага пасяджэння Генеральны сакратарыят прадставіў прапановы па ўдасканаленні метадалогіі працы XIV Звычайнай Генеральнай Асамблеі Сінода Біскупаў.