Іракскі Патрыярх прапануе хрысціянам аб’яднацца

Халдэйска-каталіцкі Патрыярх Луіс Рафаэль Сака звярнуўся з драматычным заклікам да адзінства хрысціян у Іраку, якія церпяць пераслед ад ісламістаў. Патрыярх прапанаваў, каб тры старажытных Царквы, якія дзейнічаюць на тэрыторыі Ірака, аб’ядналіся ў адзіны Патрыярхат. Кіраўнік Халдэйска-каталіцкай Царквы прапануе, каб ён быў падпарадкаваны Папе.

Гаворка ідзе пра аб’яднанне Халдэйска-каталіцкай Царквы з нестарыянскімі Асірыйскай Царквой Усходу і Старажытнай Царквой Усходу. Гэтыя дзве Цэрквы ў цяперашні час не знаходзяцца ў зносінах з Рымам. Але ў 1994 г. Патрыярх Мар Дзінха IV, кіраўнік Асірыйскай Царквы Усходу, і папа Ян Павел II зрабілі сумесную заяву, пацвердзіўшы, што іх Цэрквы вызнаюць агульную веру. Праз два гады Асірыйская Царква Усходу і Халдэйска-каталіцкі Патрыярхат стварылі камісію, каб даследаваць перспектыву аб’яднання.

Старажытная Царква Усходу – адгалінаванне Асірыйскай Царквы, якое паўстала ў 1964 г.

Асірыйская Царква Усходу ў цяперашні час не мае Прадстаяцеля. Пасля смерці Мара Дзінхі IV у сакавіку 2015 г. іракскія біскупы вырашылі адкласці выбары новага Патрыярха да верасня па прычыне нестабільнасці ў краіне. 

Патрыярх Луіс Рафаэль Сака заявіў, што ён гатовы пакінуць сваю пасаду, каб вызваліць дарогу для новага лідэра, які быў бы прызнаны ўсімі трыма іракскімі хрысціянскімі Цэрквамі.