Пантыфік спачувае ахвярам урагану “Эрыка”

Папа Францішак выказаў свае спачуванні ў сувязі з гібеллю людзей і велізарнымі разбурэннямі на востраве Дамініка, у Карыбскім басейне, якія выклікаў магутны трапічны ураган. У спецыяльнай тэлеграме, скіраванай за подпісам кардынала Дзяржсакратара Пьетра Параліна, Святы Айцец запэўніў у сваёй малітве за ахвяраў прыроднага катаклізму і за ўсіх, хто задзейнічаны ў выратавальных працах. Ён даверыў памерлых Божай міласэрнасці і пажадаў надзеі і супакою сем’ям тых, хто загінуў, і ўсім пацярпелым ад катастрофы. 

Трапічны ўраган “Эрыка” абрынуўся на краіны Карыбскага басейну 29 жніўня 2015 г. Найбольшы ўрон быў нанесены астраўной дзяржаве Дамініка, дзе страцілі жыцці каля 20 чалавек.