2016-05-24 10:13:00

Новы кусташ Святой Зямлі: хрысціяне Алепа патрабуюць малітвы


Пасля ракетнага ўдару па будынку францішканскай школы ў Алепа 22 мая 2016 г., новы кусташ Святой Зямлі заклікае аб умацаванні малітвы за Сірыю. “Хрысціяне ў Алепа патрабуюць нашай малітвы, посту і адрачэнняў”, - сказаў Ватыканскаму радыё а. Франчэска Патан.

Новы кусташ знаходзіцца ў пастаянным кантакце з францішканамі, якія засталіся ў ахопленым супрацьстаяннем горадзе. Ён распавёў, што школьны будынак, які падвергнуўся нападу, ужо не выкарыстоўваецца для сваёй першапачатковай мэты. Зараз у ім пражываюць хворыя і пажылыя людзі аб якіх клапоціцца мясцовая францішканская супольнасць.

“Мае субраты пацвердзілі, што ў выніку ўдару загінула адна жанчына, а двое падапечных гэтай структуры атрымалі раненні, у тым ліку адно дзіця. З францішканамі нічога не здарылася, хоць, канешне, ўсе яны засмучаны і напалоханы. Тым не менш, яны запэўнілі, што нягледзячы на рызыкі не пакінуць Алепа, бо жадаюць застацца побач з тымі, хто быў давераны іх апецы і душпастырскаму клопату”, - сказаў ён.

Айцец Франчэска Патан быў прызначаны новым кусташам Святой Зямлі 20 мая 2016 г. Ён паходзіць з паўночнай Італіі і належыць да Ордэну меншых братоў. Святар замяніў на гэтай пасадзе а. Пьербаціста Піцабалу, які апекаваўся кустодыяй Святой Зямлі на працягу апошніх дванаццаці гадоў. Рашэнне было зацверджана Апостальскай Сталіцай.








All the contents on this site are copyrighted ©.