У ліпені не будзе агульных аўдыенцый. Таксама колькасць публічных мерапрыемстваў з удзелам папы Францішка будзе зведзена да мінімума. Гэта вынікае з апублікаванай 1 ліпеня 2016 г. праграмы дзейнасці Пантыфіка на другі летні месяц.
У ліпені Францішак працягне сустракацца з вернікамі на нядзельнай малітве “Анёл Панскі”, за выключэннем апошняй нядзелі, 31 ліпеня. У гэты дзень марыйную малітву ён правядзе ў Кракаве, на заканчэнне галоўнай св. Імшы Сусветных дзён моладзі, якія стануць галоўнай падзеяй ліпеня ў Касцёле. Святы Айцец будзе знаходзіцца ў Польшчы з 27 па 31 ліпеня.
Адзіную ў гэтым месяцы аўдыенцыю для вернікаў Пантыфік правядзе ў панядзелак 6 ліпеня для 200 хворых з Францыі, якіх будзе суправаджаць кардынал Філіп Барбарэн, арцыбіскуп Ліону і Прымас Галіі.
Такі парадак правядзення публічных мерапрыемстваў з удзелам Папы традыцыйны для летніх месяцаў.
All the contents on this site are copyrighted ©. |