Святы Айцец за канструктыўны дыялог з Кітаем

Францішак хоча, каб дыялог Святога Пасаду з Кітаем быў канструктыўным. У гэтым запэўніў бліжэйшы супрацоўнік Пантыфіка, кардынал Пьетра Паралін, у сваім звароце да ўдзельнікаў канферэнцыі пад назвай “Каталіцкі Касцёл у Кітаі: паміж мінулым і будучыняй”. Сустрэча была арганізавана ў Рыме 30 мая 2017 г. Супольнасцю св. Эгідзія, Каталіцкім універсітэтам “Sacro Cuore” ў Мілане і “World History Academy”.

Дзяржаўны сакратар Яго Святасці Папы ў сваім пасланні да ўдзельнікаў выказаў спадзяванне, што форум паспрыяе вывучэнню вельмі актуальнай на сённяшні дзень тэмы і ўпішыцца ў кантэкст сустрэчы паміж тысячагадовай кітайскай культурай і хрысціянскай духоўнай спадчынай. Ён таксама ўпэўнены, што дэбаты будуць суправаджацца канструктыўным духам, да якога так шмат разоў заклікаў Францішак каталіцкую супольнасць.

Андрэа Рыкардзі, заснавальнік Супольнасці св. Эгідзія, адкрываючы канферэнцыю, звярнуў увагу на “паскарэнне адносін”, якое мела месца ў пачатку пантыфікату Францішка, і, перш за ўсё, на змену перспектывы: “З цяперашнім Папам кітайскае пытанне было цалкам пазбаўлена ідэалогіі і скіравана на ўзровень сустрэчы Касцёла з вялікай тысячагадовай культурай. Гэта палягчае дыялог і адкрывае новыя перспектывы”, - лічыць італьянскі грамадскі і касцёльны дзеяч.