У Ватыкане адбудзецца судовы працэс па растраце сродкаў

Джузэпэ Профіці, былы старшыня Фонду “Bambino Gesù”, і Масіма Спіна, яго скарбнік, атрымалі павесткі ў ватыканскі суд. Разбіральніцтва датычыць растраты сродкаў падчас рэканструкцыі памяшканняў на верхнім паверсе палацу “San Carlo”, які належыць Губернатарату Дзяржавы Ватыкан, і куды пераехаў жыць кардынал Тарчызіа Бэртонэ пасля сыходу з пасады Дзяржсакратара. На гэтыя мэты было прызначана 422 тыс. еўра сродкаў Фонду.

У абвінавачанні, прадстаўленым ватыканскім прамотарам справядлівасці Джан Пьетра Мілана, гаворыцца, што Профіці і Спіна незаконна выкарыстоўвалі сродкі Фонду і рабілі гэта ў інтарэсах кампаніі прадпрымальніка Джанантоніа Бандэра. Правапарушэнне было ўчынена ў Ватыкане з лістапада 2013 г. па май 2014 г.
  
13 чэрвеня 2017 г. старшыня ватыканскага Трыбунала Джузэпэ Дала Торэ выдаў указ аб распачацці судовага працэсу. Першае слуханне прызначана на раніцу 18 ліпеня.