Новы прэфект: Касцёл марнее, калі закрываецца сам у сабе

“Я прабываю ў глыбокай і натуральнай гармоніі з папам Францішкам. З нашых размоў вынікае агульнасць перакананняў”, – прызнаўся новапрызначаны прэфект Кангрэгацыі Веравучэння, іспанскі арцыбіскуп Луіс Франсіска Ладарыя Фэрэр, падчас свайго нядаўняга візіту ў Аргентыну. Іерарх даў інтэр’ю мясцоваму часопісу “Vida Nueva”, у якім падзяліўся думкамі аб новай пасадзе і сваім разуменнем сутнасці каталіцкага веравучэння.

Нагодай для паездкі арцыбіскупа Ладарыі на радзіму папы Францішка стаў удзел ў Міжнародным сімпозіуме катэхетаў Буэнас-Айрэса і Лацінскай Амерыкі, які праходзіў на тэалагічным факульцеце Аргентынскага каталіцкага ўніверсітэта з 11 па 14 ліпеня 2017 г. Падчас свайго выступлення на форуме іерарх, між іншым, адзначыў важную ролю вобразаў і выяў для перадачы веры. Пазней, у ходзе размовы з журналістамі, ён паясніў, што “вера прыходзіць праз вочы”. “У эпоху Сярэднявечча, у перыяд велічных сабораў, людзі не ўмелі чытаць – вера перадавалася праз вітражы, фрэскі, карціны”, – нагадаў ватыканскі іерарх. Сёння ж, у час інфармацыйнага перанасычэння, здольнасць перадаваць праўды веры патрабуе, перш за ўсё, крэатыўнасці, не толькі тэолагаў, але і катэхэтаў, душпастыраў, упэўнены прадстаўнік Святога Пасаду.

Новы прэфект выказаў перакананне, што Касцёл марнее, калі закрываецца сам у сабе, бо ў такім выпадку губляе самае сутнаснае – евангелізацыю. Акрамя таго, яго галоўным прынцыпам павінна заставацца ўсебаковае бачанне чалавека. “Не “любоў да Бога або любоў да бліжняга”, але “любоў да Бога і да бліжняга” – вось галоўны прынцып Касцёла. Гэтаму навучае Езус у Евангеллі”, – сказаў іерарх.

Згодна з рашэннем Святога Айца Францішка, арцыбіскуп Луіс Франсіска Ладарыя Фэрэр узначальвае Кангрэгацыю Веравучэння з 1 ліпеня 2017 г. На гэтай пасадзе ён змяніў нямецкага кардынала Герхарда Людвіга Мюлера, які кіраваў галоўнай ватыканскай кангрэгацый на працягу пяці папярэдніх гадоў.