Новы дырэктар ватыканскага выдавецтва на “Buchmesse”

На Міжнародным кніжным кірмашы ў Франкфурце дэбютаваў новы дырэктар Ватыканскага выдавецтва (Libreria Editrice Vaticana). 39-гадовы італьянскі францішканін, брат Джуліа Цэзарэа з’яўляецца доктарам тэалогіі, выпускніком каталіцкага ўніверсітэта ў Фрыбургу ў Швейцарыі.

Паводле слоў прысутнага на “Buchmesse” мансеньёра Дарыё Эдоарда Вігано, прэфекта Сакратарыяту па камунікацыі, у падпарадкаванні якога ў цяперашні час знаходзяцца ўсе ватыканскія сродкі масавай камунікацыі і медыя-структуры, змена на пасадзе дырэктара выдавецтва з’яўляецца часткай рэформы, якая праходзіць згодна з рэкамендацыямі папы Францішка.

Папярэдні кіраўнік выдавецтва, салезіянін Джузэпэ Коста пакінуў гэту пасаду 30 чэрвеня 2017 г. Ён выконваў свае абавязкі на працягу апошніх дзесяці гадоў.