Кардынал Рэйнхард Маркс заклікаў да больш глыбокага разумення бягучай сацыяльнай сітуацыі ва Усходняй Еўропе. “Мы павінны ўлічваць той факт, што краіны Усходняй Еўропы маюць сваю ўласную гісторыю і ў ХХ стагоддзі іх ідэнтычнасць была паранена неаднойчы”, - сказаў старшыня Рады Біскупскіх Канферэнцый Еўрапейскай Супольнасці і член Рады кардыналаў па дапамозе Святому Айцу ў кіраванні Касцёлам.
Ён прызнаў, што яго непакояць цяперашнія спробы падзелу на Заходнюю і Усходнюю Еўропу і катэгарычна заявіў, што ён не падтрымлівае нацыяналістычных і дыктатарскіх ідэй. Таксама і ў Касцёле ў наш час на першы план выходзіць нацыяналізм і папулізм, а касцёльная традыцыя выкарыстоўваецца для падтрымкі ўласнай палітычнай ідэнтычнасці, лічыць іерарх. “Гэта ўзаемная інструменталізацыя: некаторыя касцёльныя групы выкарыстоўваюць палітыку для сваіх уласных інтарэсаў, а некаторыя палітыкі выкарыстоўваюць рэлігію, і не толькі хрысціянства, каб дадаць дынамікі сваім ідэям”, - сказаў кардынал Маркс у інтэрв’ю Ватыканскаму радыё.
Арцыбіскуп Мюнхенска-Фрайзінгскі таксама падкрэсліў, што Каталіцкі Касцёл з самага пачатку падтрымліваў працэс еўрапейскага адзінства і працягвае рабіць гэта сёння. Біскупы хацелі б стымуляваць далейшыя дзеянні ў еўрапейскім праекце, бо лічаць, што Еўрапейскі Саюз знаходзіцца ў крызісе.
Нагодай для размовы стала канферэнцыя пра будучыню Еўропы, якая пачынаецца праз некалькі дзён. 27-29 кастрычніка 2017 г., на запрашэнне Рады Біскупскіх Канферэнцый Еўрапейскай Супольнасці, у Рыме збяруцца 340 хрысціян са свету палітыкі, эканомікі і навукі. Кожная з 28 дзяржаў-членаў накіруе двухасабовую дэлегацыю.
All the contents on this site are copyrighted ©. |