cацыяльныя сеткі:

RSS:

Ватыканскае радыё

Голас Папы і Касцёла ў дыялогу са светам

Старонкі іншых рэдакцый:

Святы Пасад \ Падзеі і дакументы

Святы Пасад заклікае нехрысціян да малітвы і посту за мір

Святы Пасад заклікае нехрысціян да малітвы і посту за мір

08/02/2018 12:24

Папская рада па міжрэлігійным дыялогу скіравала заклік да вызнаўцаў розных рэлігій, далучыцца да Дня малітвы і посту ў інтэнцыі міру, абвешчанага папам Францішкам. Ён пройдзе 23 лютага 2018 г. ва ўсім Каталіцкім Касцёле. Святы Айцец заклікаў асаблівым чынам звярнуць увагу на Дэмакратычную Рэспубліку Конга і Паўднёвы Судан.

“Папская рада па міжрэлігійным дыялогу, усведамляючы, што рэлігіі могуць значна паспрыяць дасягненню і ўмацаванню міра, будзе ўдзячная братам і сёстрам іншых веравызнанняў, якія пажадаюць адгукнуцца на гэты заклік і перажыць моманты малітвы, посту і разважання згодна з сваімі традыцыямі і ва ўласных месцах культу”, - гаворыцца ў спецыяльным паведамленні ватыканскай дыкастэрыі.

Гаворка ідзе пра ўжо другую малітоўную ініцыятыву Францішка, накіраваную на спрыянне міру ў Дэмакратычнай Рэспубліцы Конга і Паўднёвым Судане. 23 лістапада 2017 г. у Ватыкане праходзіла спецыяльная малітва аб прымірэнні ў гэтых краінах, якую ўзначальваў сам Папа.

Дэмакратычная Рэспубліка Конга з’яўляецца другой па велічыні краінай на кантыненце. Яна размешчана ў Цэнтральнай Афрыцы, у басейне ракі Конга. З 1993 г. тут з рознай інтэнсіўнасцю ідзе грамадзянская вайна.

Паўднёвы Судан у якасці незалежнай дзяржавы існуе з 9 лiпеня 2011 г. Побач з памежным канфліктам з Суданам тут мае месца ўнутраны канфлікт на этнічнай глебе. Сур’ёзнай пагрозай з’яўляецца праблема голаду. Амаль палова насельніцтва краіны не мае доступу да пітной вады.


08/02/2018 12:24