2018-05-14 13:58:00

Даследчыкі архіваў Рымскай інквізіцыі збяруцца ў Рыме


Каля сарака навукоўцаў з краін Еўропы і Паўночнай Амерыкі прымуць удзел у Міжнароднай канферэнцыі “Рымская інквізіцыя і яе архівы”. Форум пройдзе 15-17 мая 2018 г. у старажытным палацы дамініканскай інсулы Санта-Марыя-Сопра-Мінерва ў Рыме, з нагоды 20-годдзя адкрыцця для даследчыкаў архіваў Кангрэгацыі Веравучэння.

З уступным словам перад удзельнікамі форума выступіць арцыбіскуп Франсіска Луіс Ладарыя Фэрэр, прэфект узгаданай дыкастэрыі Рымскай курыі. Сярод тэм, якія будуць абмяркоўвацца на канферэнцыі: межы навуковых даследаванняў; месцы і асобы, звязаныя з Рымскай інквізіцыяй; Рымская інквізіцыя ў літаратуры, кіно і публіцыстыцы.

У рамках форума, у рымскай базіліцы Санта-Марыя-Сопра-Мінерва адбудзецца канцэрт музычнай капэлы “Santa Maria in Portico in Campitelli” і ансамбля “La Cantoria”, якія выканаюць араторыю кс. Франчэска Нікола Дэ Росі “Падзенне анёлаў”.

Канферэнцыя стане чацвёртай падзеяй у рамках цыклу “Memoria Fidei”, які праводзіцца з 2013 г. з мэтай наладжвання супрацоўніцтва паміж касцёльнымі архівамі.

Архівы Кангрэгацыі Веравучэння былі адкрыты для даследчыкаў у студзені 1998 г. Урачыстая інаўгурацыя праекту прайшла ў Нацыянальнай акадэміі дэі-Лінчэі – акадэміі навук Італьянскай Рэспублікі. Узначальваў цырымонію тагачасны прэфект Кангрэгацыі Веравучэння, кардынал Ёзэф Ратцынгер, будучы папа Бэнэдыкт XVI.

Кангрэгацыя Веравучэння (лац. Congregatio pro Doctrina Fidei) – найстаражытнейшая і галоўная дыкастэрыя Рымскай курыі, заданнем якой з’яўляецца назіранне за чысцінёй дактрыны і маралі Каталіцкага Касцёла, таму ўсё, што любым чынам тычыцца гэтых пытанняў, знаходзіцца ў межах яе кампетэнцыі.








All the contents on this site are copyrighted ©.